Mizoaw.com

Mizo Aw

Zirtawpni. March.5.2010

Phekhma

Mizo Aw News hi thulakna(Source) ziahlan loh chuan chhuahchhawn phal a ni lo.

I computer-ah VNT Times Fonts intstall la tichuan tri(\) i hmu thei ang.

Chapchar Kut Leh Cheraw

Kan Programme Duangfel

Dt. 5.3.2010 : Nimin khan Art & Culture Minister Pu PC Zoramsangliana hovin a bangla-ah Chapchar Kut leh Guinness World Record siamna tura Organising Committee an \hukhawm a. Hemi ni atana hun hman dan tur Programme an siam fel ta.

March ni 11, 2010-ah hian Chapchar Kut chawhma dar 10:30-ah AR Lammual-ah Chapchar Kut lawmna programme hi \an a ni anga. Kut Pa atan Pu Lal Thanhawla, Chief Minister niin Kut Thlengtu a tan Pu PC Zoramsangliana, Art & Culture Minister a ni ang. Kut Thlengtupa-in thuhma tlem a sawi zawhah hunserh Bishop Stephen Rotluanga’n a hmang anga. Bethlehem Corps-ten rimawi remin chumi zawhah hlado chham leh silai kahin a zui ang.

Inlawmna thu Pu Lalchungnunga, President, CYMA-in a sawi anga. Khatla YMA Branch zaipawlte an zai anga, Kut Pa thusawiin a zui ang. Heng bakah hian Cheraw Kan runpui, mal zai, mipa zai rual, tlanglam, chhawnghnawh, darbu tum, pipu zai leh pawnto leh lemchanten a zui anga, nilengin hun hlimawm taka hman tum a ni.

March ni 12, 2010-ah hian Bamboo Dance (Cheraw Kan)-a Guinness World Record siam tumna programme hman a ni anga. Chhun dar 12:00 a\anga chawhnu dar 2:00 thleng inenlawknaa hun hman a ni anga, chawhnu dar 2:00-ah chiah Guinness World Record atan Cheraw kan a ni anga. London a\anga lo kal Adjudicator-in a endik nghal ang. Record siamna atana Cheraw kan zawhah hian vawikhat kan chhuahleh a ni anga, tichuan Assam Rifles Lammual-ah result puanna leh certificate hlanna neih nghal a ni ang. Chawhnu dar 4:00-ah ropui thei ang berin baloon thlawk thei, hlado leh tlangtlirten a zui anga, Ramhlun North leh South Branch YMA zaipawlin ‘Lalpan thil ropui tak min tihsak e’ tih hla an rem anga, hemi hnu hian Zira Hnamte, ‘Sudden Muanga Champion of the Mizo’ tih leh KC Runremsangi, Lallawmpuia leh K.Lalthangzela-ten Hnam Hla in an awi nghal anga. Hemi zawh hian Adjudicator hian Press Conference a nei zui dawn a ni.

Hemi ni chhim tur hian India ram pawn leh India ram chhung hmun hrang hrang a\angin an lokal dawn a, Lammual-ah Cheraw kan bu 141 leh a dang zawng Sikulpuikawn a\anga Chanmari kawn thleng an entir anga. Helicopter-in chunglam a\angin thla a la bawk dawn a ni. Hemi ni hian a chhim tur mipui zawng zawngte Mizo hnam incheia inchei vek tura beisei an ni a. Hlim thei ang bera hman tum a ni.

Laldingliana’n YMA Conference Hmanpui

Dt. 5.3.2010 : Pu S. Laldingliana, Parliamentary Secretary chuan YMA Sub. Hqrs. Lunglei district conference Darzo-ah niminpiah khan khual lian niin a hmanpui.

|halai sang rual kalkhawm hmaa thu sawiin Pu Dinga chuan YMA kumpuan khawtlang nun siam \hat hi kan ram tana thil \ulberte zing ami a ni a. Chumi siam\ha tur chuan mimal tin leh chhungkaw tin a\anga a siam\hat hna hi kan \an a ngai a ni a ti. A sawizelnaah Pu Dinga chuan YMA-te hian ram hruaitute hi thil dilna mai atana hman loh hi mipuite zirtirtu ni se a duh thu a sawi a. Chutiang bawk chuan kan Chief Minister pawh hian mipuiten ramhruaitu \ha an beisei ang bawkin ram hruaitute hian mipui \ha a beisei thu a sawi a ni a ti. Hriselna chungchang sawiin Mizoram chu kristian state kan ni a, kristiante chu thianghlim leh fel tur kan nih laiin a hrisel lo leh thil \ha lo laka inhnamhnawih hnam kan nihnaah hian insiam\hat kan ngai a ni a ti.

Mizoramah hian tuna thisen a test tawh en in HIV/AIDS hrik pai hi mi 40000 chuang kan awm mai awm mang e tih hi mi thiamte chhut dan a ni a. Chuvangin heng kawngah te hian kan fihlim theih nan sawrkar leh YMA-te kan thawhhoa he thil hlauhawmtak laka kan fihlim theih nan theih tawpa \anlak a ngai a ni a ti.

National Seminar On Education

Security Zawhfel A Ni

Dt. 5.3.2010 : Ni hnih awh Mizoram bil huapa Education Security chungchang National Seminar I & PR Conference Hall-a neih chu nimin tlai khan Parliamentary Secretary Pu Chawngtinthanga’n Seminar chhimtute hnena Certificate hlanin a khar ta.

He seminar hi J.Thankima College leh Mizoram Educational Foundation ten University Grants Commission leh Mizoram Higher & Technical Education department bultuma an huaihawt a ni a. Ni hnih chhung seminar-ah hian zirna lama thil pawimawh hrang hrang thupui thlanchhuah mi thiamte sawi ngaihthlaka zirho a ni a. State pawn a\ang pawhin chhimtu engemaw zat an tel a ni.

Seminar kharna hun leh session hnuhnung ber hi Dr. S. Hom Chaudhuri-an a kaihruai a. Dr. Malsawmi thuziak hmarchhak bial huapa zirna lam leh khawvel zim tak kara hmachhawn tur hrang hrang tih zirho a ni.

Pu Chawngtinthanga chuan hetiang seminar changkang tak buatsaih a nih chungchangah lawmthu sawiin heta an thuzir leh rawtna hrang hrang chhawpchhuahte chu Mizoram sorkar policy pui ber pakhat zirna tihchangtlun kawngah thil tangkai tak a nih a beisei thu a sawi.

Sesawng High School Building Lungphum

Dt. 5.3.2010 : Rashtriya Madhyamik Shiksha Abhiyan (RMSA) hnuaia cheng nuai 52.12 senna tur Sesawng High School Building lungphum chu nilaini khan Parliamentary Secretary Pu Chawngtinthanga’n a phum.

Parliamentary Secretary chuan lungphum paha thu sawiin ramin hma a sawn dawnin Education-in hma a hruai a, ram a tlukchhiat dawn pawhin Education bawk chu a hmahruaitu a ni fo \hin tiin Mizorama zirna tichangtlung tura sawrkarin theihtawp a chhuah mek thu a sawi. Mizoram chu state pachhia a nih avangin a sum mamawh zaa 80-90% lai sawrkar laipui tumsak a nih \hin laiin Secondary Education tihchangtlunna tura RMSA duanchhuah a nih chu thil lawmawmtak a tling a, hemi hnuaia Sesawng khuain High School sak \hatna tur an dawng ve pha chu a lawmpui thu a sawi.

Building thar sakna tur lungphum inkhawm hi RMSA Project Director Pu B.Lalchhuanliana’n kaihruaiin a sak dan tur kimchang Er.A.Laltinkima’n a sawi a. SSA leh School Education Department officer pawimawhte an tel a ni.

Bangladesh-Northeast India Trade Conclave-a Mizoram Aiawhte Lo Hawleh Ta

Dt. 5.3.2010 : Bangladesh-North East India Trade & Investment Conclave leh Joint India-Bangladesh Trade Show February ni 25, 2010 Dhaka khawpuia Mizoram aiawha zuk kal te chu tluang takin March ni 2 khan Aizawl an lo thlengleh tawh a. Hemi \uma sawm an nih anga zuk kalte hi Trade & Commerce Minister Pu Lalrinliana Sailo, Parliamentary Secretary Pu S.Laldingliana, Trade & Commerce Secretary Pi Esther Lalruatkimi leh Trade & Commerce Director Dr.C.Lalzirliana te an ni.

Conclave hi Bangladesh sawrkar Foreign Affairs Minister Dr. Dipu Moni-in a hawng a. Trade & Investment Opportunities Session-ah Mizoram Trade & Commerce Minister Pu Lalrinliana Sailo chuan thuhma sawina hun changin tunah chuan Banladesh sawrkar leh Mizoram-ten inpawhtawntakin hma an laho thei tawh dawn a ni a ti a, Conclave chungah lawmthu a sawi. Pi Esther Lal Ruatkimi pawhin Mizorama sumdawnna bul\an turte tana thil hriat tur leh kawng inhawn zau \hatdante a sawi zui bawk. Hemi zan hian Bangladesh Prime Minister Sheikh Hasina kawmna hun \hatak a nei nghal a, Bangladesh PM hnena thil pawimawh chi hrang hrangte chu - Ram pahnih Foreign Minister-ten 24 September, 2009-a Thegamukh-Demagiri inkara Trade Route hawn rem tih thu Joint Statement an siam chungchangte; Mizoram thlai, mau leh thildang tharchhuah Bangladesh-a hralhchhuah tur a neihte; Tlabung Kawrpuichhuah hmuna insumdawn tawnna hmun tur ram hectare 9 laia zau pek fel a nih tawh dan te leh Thegamukh, Bangladesh lama Land Customs Station emaw Integrated Check Post din thuai a \ul dan te bakah Mizoram chu lehkhathiam tamna state leh state ralmuang a nih avanga sumdawngtute tan remchanna thuitak a inhawn chungchangte an ni.

Mizoram aiawha zuk kalte hian February ni 27, 2010 khan Chittagong an tlawh bawk a. Hetah hian Bawm zirlaite nen inkawmna hun \hatak hmangin Mizoram Chief Minister Pu Lal Thanhawla’n Zoram pawna Zohnahthlakte thlavang a hauhzia an sawiho a ni.

February ni 28-ah Cox Bazar tlawhlehin hetah hian Mayor, Chittagaong City Corporation Pu A.B.M. Mohiuddin Chowdhury-in zanriah a buatsaihsak a ni.

Bangladesh an cham chhung hian Pu Dipankar Talukdar, M.P., State Minister, Ministry of Chittagong Hill Tract Affairs leh Pu Shiv Goyal Shankar, Chairman, Gmbt. (Garment Exporter)-te hmuin Mizoram tana \angkai thei thil chi hrang hrang huam zautakin an sawipui a ni.

Mizoram a tana zuk fehchhuakte hi Pu Ashok Yadav, First Secretary, Dy. Indian High Commission-Chittagong chuan a \ul anga lo buaipuiin March ni 1 khan Chittagong International Airport a\angin a rawn thlah liam a. March ni 2, 2010 khan damtakin Aizawl an lo thleng a ni.

Mizo Aw News hi thulakna(Source) ziahlan loh chuan chhuahchhawn phal a ni lo.